കലിയുഗവരദനായ ശബരിമല ശ്രീ അയ്യപ്പന്റെ പാദസ്പർശം കൊണ്ട് പരിപാവനമായ പുണ്യഭൂമിയിലാണ് പാലക്കുന്ന് ശ്രീധർമ്മശാസ്താ ക്ഷേത്രം സ്ഥിതി ചെയ്യുന്നത്. കിഴക്കൻ കേരളത്തിലെ പ്രധാന ക്ഷേത്രമായ ഇവിടം ഇന്ന് ശബരിമല ഭക്തരുടെ ഇടത്താവളമാണ്. മംഗള മൂർത്തിയാണ് ഇവിടുത്തെ ശ്രീഭൂത നാഥൻ. സേവിപ്പവർക്ക് ആനന്ദമൂർത്തിയും അഭയ വരദായകനുമാണ്. സകല ചരാചരങ്ങൾക്കും ഉള്ളിലുള്ള ശക്തിയാണ് ശ്രീധർമ്മശാസ്താവ്. ധർമ്മത്തെ അനുശാസിക്കുന്നവനാണ് ശ്രീധർമ്മശാസ്താവ്.

നൂറ്റാണ്ടുകൾക്ക് മുൻപ് രാജവാഴ്ചക്കാലത്ത് തകർന്ന് നാമാവശേഷമായ ഈ ക്ഷേത്രം കൂട്ടിക്കൽ വേലനിലം മൂന്നാം മൈൽ കടുപ്പറമ്പിൽ എന്ന സ്ഥലത്താണ് നിലനിന്നിരുന്നത്. ഇവിടെയാണ് ഇന്ന് കാണുന്ന ക്ഷേത്രത്തിന്റെ മൂലസ്ഥാനം എന്ന് പഴമക്കാർ പറയുന്നു. അന്ന് നിത്യ പൂജയും 12 ഏക്കർ സ്ഥലവും ഉണ്ടായിരുന്ന ഒരു മഹാക്ഷേത്രം ആയിരുന്നു ഇത്. തുടർന്ന് കാലങ്ങൾക്ക് ശേഷം ഈ പ്രദേശം എസ്റ്റേറ്റ് മേഖലയായി മാറി. പാലക്കുന്ന് എന്ന സ്ഥലനാമം കുന്നിന്റെ മുകളിൽ നിന്നിരുന്ന കൂറ്റൻ പാലമരങ്ങളിൽ നിന്നാണ്.

മഹിഷി നിഗ്രഹത്തിനായി എരുമേലിയിലെത്തിയ അയ്യപ്പൻ പുല്ലക ആറിന്റെ ഉൽഭവസ്ഥാനത്തുനിന്നും മണിമലയാറുമായി ചേരുന്ന സംഗമ തീരത്ത് വിശ്രമിച്ചതായാണ് ചരിത്രം. അയ്യപ്പന്റെ ഇഷ്ടവാസസ്ഥലമായ പാലക്കുന്നിൽ ഭക്തജനങ്ങൾ ക്ഷേത്രം നിർമ്മിച്ച് പ്രതിഷ്ഠ നടത്തി, പൂജാദി കർമ്മങ്ങൾ ചെയ്തു വന്നിരുന്നു. എന്നാൽ രാജ ഭരണകാലത്ത് നടന്ന പടയോട്ടത്തിൽ ക്ഷേത്രം പൂർണ്ണമായും തകർന്നു. അതോടെ നാട്ടിൽ ദുരിതങ്ങളും ഏറി വന്നു. തുടർച്ചയായ പ്രകൃതിക്ഷോഭങ്ങളും രോഗാദി ദുരിതങ്ങളും ജനജീവിതം ദുഷ്കരമാക്കി. ശ്രീ ധർമ്മശാസ്താവിന്റെ സാന്നിദ്ധ്യമുള്ള പുണ്യഭൂമിയിൽ ക്ഷേത്രം പുനർനിർമ്മിക്കണമെന്നായിരുന്നു പ്രശ്നവശാൽ തെളിഞ്ഞത്. അതിൻ പ്രകാരം ക്ഷേത്രം ഇന്ന് കാണുന്ന നിലയിൽ പുനർനിർമ്മിക്കപ്പെട്ടു.